Burundi yatangaza kuutambua rasmi muungano wa upinzani wa ADC - Ikibiri

Edouard Nduwimana Waziri wa Mambo ya Ndani wa Burundi amesema kuwa, serikali ya Bujumbura imeutambua rasmi muungano wa vyama vya upinzani nchini humo. Nduwimana amesisitiza kuwa, muungano wa Alliance of Democrats for Change – Ikibiri 'ADC' ambao unaundwa na vyama vinne vya upinzani unatambuliwa rasmi nchini humo. Licha ya serikali kuutambua rasmi muungano huo, Leonce Ngendakumana kiongozi wa muungano huo ameikosoa vikali serikali ya Burundi na kusema kwamba, uamuzi huo wa serikali umetolewa kwa kuchelewa mno. Muungano wa ADC uliundwa na kutuma nyaraka zake serikalini yapata miaka minne iliyopita. Wataalamu wa masuala ya kisiasa wameeleza kuwa, huenda serikali ina malengo maalumu kwa kutangaza kuutambua rasmi muungano wa ADC- Ikibiri, wakati huu ikiwa imesalia miezi michache kabla ya kufanyika uchaguzi wa rais nchini humo. Wadadisi wa mambo wanaeleza kuwa, uamuzi huo wa serikali ya Bujumbura umechukuliwa kwa lengo la kupunguza migogoro na mikwaruzano wakati huu wa kuelekea kwenye zoezi la uchaguzi wa rais. Uchaguzi mkuu nchini Burundi umepangwa kufanyika mwezi Juni 2015, na utasimamiwa na wasimamizi wa kimataifa. Rais Pierre Nkurunziza ambaye anabanwa kisheria wakati akikaribia  kumaliza muhula wake wa pili wa uongozi wa miaka miaka mitano – mitano, bado hajatangaza rasmi kama  ataondoka madarakani au la. Katika miaka ya hivi karibuni, serikali ya Burundi imekuwa ikikabiliwa na tuhuma kadhaa za taasisi za kimataifa za kuwabana na kuwakandamiza wapinzani. Jeffrey Feltman Msaidizi wa Katibu Mkuu wa Umoja wa Mataifa alisitiza juu ya kuwepo anga na mazingira huru ya kisiasa kwa lengo la kudumisha amani na utulivu nchini humo. Inaonekana kuwa, hatua ya kupigwa marufuku maandamano nchini humo, imewatia wasiwasi viongozi wa jumuiya na taasisi za kimataifa.  Kabla ya hapo, jeshi la Burundi lilitangaza kupambana vikali na kundi lolote litakalothubutu kuwashawishi wananchi waingie barabarani na kufanya maadamano. Feltman amevitaka vyama vya upinzani kuelezea kinagaubaga mitazamo yao kwa lengo la kutatua kwa amani mivutano na migogoro ya kisiasa iliyoko nchini humo. Wadadisi wa mambo wanaeleza kuwa, kuwepo hitilafu na migongano ya kisiasa kati ya viongozi, kushindwa kufanyika mazungumzo ya kitaifa, ghasia na machafuko yanayosababishwa na umilikaji wa ardhi na kuwaingiza vijana jeshini, ni miongoni mwa changamoto kuu zinazotishia kuitumbukia nchini hiyo kwenye machafuko. Wadadisi hao wameeleza kuwa, kasoro zilizojitokeza kwenye zoezi la uandikishaji wa daftari la kudumu la kupigia kura ni miongoni mwa masuala yanayolalamikiwa na wapinzani nchini Burundi. Vyama vya upinzani vinaituhumu Tume ya Taifa ya Uchaguzi kwa kukipendelea chama tawala cha CNDD – FDD. Wafuatiliaji wa masuala ya kisiasa wanaeleza kuwa, hatua ya serikali ya Burundi ya kuutambua rasmi muungano wa ADC italeta taathira chanya katika kuboresha hali ya kisiasa nchini humo. Bila shaka, kushadidi hitilafu na mivutano katika kipindi hiki cha kuelekea uchaguzi mkuu, kunaweza kusababisha kukaririwa vita na mapigano mapya ya wenyewe kwa wenyewe nchini humo.