Mbeya City yavuna saba mchangani

KAMA ilikuwa ni Ligi tungesema Mbeya City imeambulia pointi saba baada ya kushinda mechi mbili za kirafiki na kutoa sare moja. Kikosi hicho cha Juma Mwambusi juzi kilipata wakati mgumu mbele ya Shinyanga United ya hapa na kulazimishwa sare ya bao 1-1 katika mechi iliyochezwa kwenye Uwanja wa Majimoto lakini straika, Paul Nonga akatoa onyo.

Katika mechi mbili za awali kwenye ziara hiyo dhidi ya Mazwi FC ya Sumbawanga na Makanyagio FC ya Katavi, Mbeya City ilichapa mtu mabao 3-0 kila mechi.

Vijana wa Majimoto walionekana kuikamia Mbeya City juzi kwa kufanya mashambulizi ya mara kwa mara kwenye lango lao huku wakiweka ulinzi imara kuhakikisha washambuliaji wa City hawapiti kiurahisi.

Bao la Shinyanga United lilifungwa na Kisiga Yusuph huku la Mbeya City likikung’utwa na Themi Felix. Kocha Msaidizi wa Shinyanga United, Celina Ernest, alisema kuwa hakutarajia kuona vijana wake wakilazimisha sare hiyo.

Paul Nonga ambaye ni tegemeo kwa Mbeya City alisema matokeo hayo ni changamoto kwao na kwamba walikuwa wakijifurahisha tu na kujua mashabiki wao.

Msimu uliopita kulikuwa na hofu ya ugeni kwenye Ligi Kuu lakini msimu ujao watanitaka ubaya,” alisema Nonga na kusisitiza ana imani kubwa na timu hiyo msimu ujao.