Kwa Habari za Michezo 

Logarusic aikochi Yanga mechi ya Al Ahly

KOCHA Mkuu wa Simba Mcroatia, Zdravko Logarusic, ameisaidia Yanga mbinu za kuwafunga wapinzani wao Al Ahly watakaopambana nao Machi Mosi katika mechi ya raundi ya kwanza ya Ligi ya Mabingwa Afrika.

Katika hatua ya awali ya michuano hiyo, Yanga iliitoa Komorozine ya Comoro kwa jumla ya mabao 12-2.

Akizungumza na Mwanaspoti, Logarusic, alisema wanachotakiwa kukifahamu Yanga na kocha wao, Hans Pluijim, ni kupanga wachezaji wenye uwezo mkubwa bila ya kuangalia uzoefu, ukongwe wala umaarufu.

Alisema kuwa Yanga wanatakiwa kucheza soka la kasi linalotumiwa na klabu za Uarabuni kwa ajili ya kuendana na kasi ya Ahly ndani ya uwanja na si kucheza taratibu kama wanavyofanya katika mechi za Ligi Kuu Bara.

Aliongeza kuwa wanapaswa kutumia akili nyingi na kucheza kwa tahadhari kubwa na kwamba viungo wao hawatakiwi kuwapa nafasi wachezaji wa Ahly kumiliki mpira muda mrefu kwani alisema Ahly huanzisha mashambulizi yao katikati na si pembeni.

“Wanatakiwa kucheza kwa kutumia akili nyingi, wasiwape nafasi viungo wa Ahly kumiliki mpira muda mrefu, wakiwaachia basi watapoteza mechi zote mbili, ya nyumbani na ugenini,” alisema.

“Yanga wanatakiwa kujaza viungo wengi kwa ajili ya kuizuia safu ya kiungo ya wapinzani wao kutawala mpira, ninauamini uwezo wa kufundisha wa kocha wa Yanga katika kutengeneza timu.”

Pluijm kwa upande wake alisema: “Nawaandaa wachezaji wangu katika kucheza kwa kasi, nguvu na uwezo wa kufikiri. Pia namna ya kufunga mabao wakiwa karibu kabisa na lango.

Ahly yashinda, Polisi wavamiwa

Polisi 25 wamejeruhiwa vibaya baada ya kuibuka mapambano kati yao na mashabiki wa Al Ahly muda mfupi baada ya mchezo wa Super Cup ulioikutanisha timu hiyo na Sfaxien ya Tunisia juzi Alhamisi na Ahly kushinda mabao 3-2.

Mchezo huo uliikutanisha Al Ahly bingwa wa Ligi ya Mabingwa Afrika na Sfaxien ambayo ni bingwa wa Kombe la Shirikisho, ulichezwa kwenye Uwanja wa Cairo na kuruhusiwa na Fifa na Serikali kuingiza mashabiki 30,000 tu ikiwa ni ruhusa maalumu.

Kwa mujibu wa taarifa ya Wizara ya Mambo ya Ndani ya Misri, mapambano hayo ya polisi na mashabiki, yalitokea sekunde chache baada ya mchezo huo kumalizika ambapo mashabiki wa Al Ahly walivamia uwanja na kuanza kurusha vitu mbalimbali.

Okwi akabidhiwa vita ya Azam na Yanga

KWA idhini ya Fifa, Yanga itamrejesha kwa mara ya kwanza uwanjani straika wake, Emmanuel Okwi ambaye usajili wake ulikuwa na utata.

Benchi la ufundi limempa kazi moja tu kuipiga Ruvu Shooting na kupunguza nyodo za Azam inayopepea kileleni kwenye msimamo wa Ligi Kuu Bara.

Azam chini ya Kocha wake, Mcameroon, Joseph Omog ilikuwa na malengo mawili msimu huu, kucheza hatua ya makundi ya Kombe la Shirikisho na kutwaa ubingwa wa Bara. Lakini baada ya kuchemsha na kutolewa na Ferroviario ya Msumbiji, Straika wa Azam, Kipre Tchetche ameliambia Mwanaspoti kwamba sasa hasira zao ni kwenye Ligi Kuu na watapambana kiume wakianza dhidi ya Prisons kesho Jumapili kwenye Uwanja wa Chamazi.

Mechi ya Yanga leo Jumamosi ni muhimu kwao kusaka pointi za kuongoza lakini mashabiki wamepania kuona vitu vya Okwi aliyekuwa amezuiwa kucheza na Shirikisho la Soka la Tanzania (TFF) lililokuwa likitaka muongozo wa Fifa ambao waliwajibu kuwa Okwi ni halali.

Ruvu Shooting imembeza Okwi na imewapa kazi mabeki wake wawili, Mbonosi Mangasini na Shaaban Sunza ‘Chogo’ wahakikishe kwamba straika huyo hana madhara.

Mkenya Tom Olaba ambaye ni kocha wa Ruvu alisema: “Eti kila mtu Okwi, Okwi kwani huyo Okwi ni nani. Hivi huyo ni mtu spesho sana,  Okwi, Okwi anaweza kucheza na wachezaji 11 wa Ruvu, simhofii hata kidogo, nitakachokifanya ni kucheza na timu nzima na si yeye mmoja.”

Olaba hawajui wala hajawaona Yanga ila atakachokifanya, ndani ya dakika 15 za mwanzo ni kuwasoma na kuwadhibiti ingawa kocha msaidizi wa Yanga, Boniface Mkwasa aliifundisha Ruvu mzunguko wa kwanza hivyo anajua kiufundi uwezo wa mchezaji mmoja mmoja.

Kocha wa Yanga, Hans Van Der Pluijm ambaye atawakosa, Mnyarwanda Haruna Niyonzima ‘Fabregas’ mwenye kadi tatu za njano, Hussein Javu na Reliants Lusajo ambao ni majeruhi alisema: Tumejiandaa vizuri kuhakikisha tunashinda, timu ipo vizuri.

Coastal Union vs Mbeya City

Mbeya City itatokea Mombasa ilikokuwa imeweka kambi ya muda kuja Tanga kuikabili Coastal Union ambayo kiwango chao hakijauridhisha uongozi kutokana na matokeo hafifu ambayo hayaendani na kambi waliyoweka Oman.

Noah tano za madiwani wa Jiji la Mbeya na mabasi matatu ya mashabiki yaliingia Tanga jana Ijumaa usiku kuisapoti timu yao katika mechi hiyo.

Azam inaongoza ligi hiyo na pointi 36, Yanga ni ya pili ina 35, pointi sawa na Mbeya City inayoshika nafasi ya tatu, wakati Simba ni ya nne ina pointi 32.

            Logarusic: Nipo tayari kujiuzulu

KOCHA wa Simba Mcroatia, Zdravko Logarusic (52) amesema yupo tayari kubwaga manyanga endapo uongozi hautaridhika na mwenendo wa timu aliyoanza kuinoa Desemba mwaka jana.
Simba ilishinda mechi dhidi ya Rhino Rangers na JKT Oljoro huku ikitoka sare na Mtibwa Sugar na Mbeya City na kufungwa na Mgambo JKT 1-0.
Akizungumza na Mwanaspoti, katika Makao Makuu ya Klabu ya Simba, Msimbazi, Kariakoo, Dar es Salaam jana Ijumaa, Loga alisema: “Mimi ni kocha mzoefu na nimewahi kufundisha baadhi za timu za Afrika hivyo kama Simba wataona mwenendo wa timu si mzuri, nitakuwa tayari kuondoka mwenyewe bila ya kufukuzwa na viongozi.”
“Mfano niliondoka Gor Mahia ya Kenya bila kufukuzwa wakati timu ikiwa kwenye nafasi nzuri ya kuchukua ubingwa, ni jambo la kushangaza ila kama kocha lazima ukubali kubeba mzigo,” alisema.
Logarusic amekifanyia mabadiliko  kikosi chake kabla ya mchezo wa kesho Jumapili dhidi ya JKT Ruvu, katika mabadiliko hayo jeshi hilo linaundwa na viungo wakabaji saba.
Loga amekuwa akiwatumia kiungo Henry Joseph kucheza kama beki wa kushoto, William Lucian ‘Gallas’ akiwa kulia wakirahisisha majukumu ya ukabaji wakisaidiana na mabeki wa kati Donald Mosoti na Joseph Owino huku katika kiungo kukiwa na Jonas Mkude, Said Ndemla, Ramadhan Singano ‘Messi’, Haruna Chanongo na Amri Kiemba.
Alisema; “Siku zote hatumpangi mchezaji kwa kuangalia anacheza namba gani, tunachofanya tunampanga mchezaji kwa kumpa majukumu yake anayotakiwa kuyatekeleza uwanjani.

Chuji, Okwi kuibeba Yanga Misri

KIUNGO wa Yanga, Haruna Niyonzima anaamini kurejea kikosini kwa kiungo Athuman Idd ‘Chuji’ na straika Emmanuel Okwi kumeiongezea nguvu timu yao na morali ya kufanya vizuri katika mchezo dhidi ya Al Ahly.

Yanga itacheza mechi ya raundi ya kwanza ya Ligi ya Mabingwa Afrika dhidi ya Al Ahly ya Misri Jumamosi ya Machi Mosi mwaka huu jijini Dar es Salaam.

Chuji hakuwepo katika kikosi cha Yanga kilichocheza mechi ya awali hapa nchini dhidi ya Komorozine kutokana na kutumikia adhabu ya kadi nyekundu lakini alicheza pambano la marudiano mjini Mitsamiouli, Comoro. Okwi alikuwa na matatizo ya usajili.

Akizungumza na Mwanaspoti, Niyonzima alisema Chuji na Okwi ni wachezaji wenye uzoefu na mechi za kimataifa, hivyo wataisaidia Yanga kufanya vizuri mbele ya Al Ahly ambao ni mabingwa watetezi wa michuano hiyo.

“Naamini Chuji na Okwi watatusaidia katika mechi dhidi ya Al Ahly, hii si mechi ndogo hivyo inahitaji wachezaji wenye uzoefu na uwezo wa hali ya juu, nadhani kocha atajua nini cha kufanya ili tuwe nao kikosini japokuwa yeye ndiye anaamua nani acheze.

“Si kwamba wachezaji waliobaki hawana mchango katika Yanga, lakini kiuhalisia Chuji na Okwi wana mchango wao katika timu kama ilivyo kwa wachezaji wengine,” alisema Niyonzima.

Baada ya mchezo wa kwanza nchini, timu hizo zitarudiana baada ya siku saba nchini Misri ambapo idadi ya mashabiki maalumu ndiyo itakayoruhusiwa kuingia uwanjani kutazama mechi hiyo.

Yanga imeingia kambini Bagamoyo katikati ya wiki hii siku chache baada ya kurejea nchini kutoka Comoro ilipocheza na Komorozine na kuitoa katika hatua ya awali kwa jumla ya mabao 12-2.