Kocha mpya Stars amchenjia Yondani

KOCHA mpya wa Taifa Stars, Mart Nooij, ameanza kazi na beki mahiri wa Tanzania, Kelvin Yondani. Beki huyo awali aliitwa kwenye kikosi kilichopigwa mabao 3-0 na Burundi, lakini akaingia mitini.

Mart alivyokabidhiwa timu na majina akalikuta jina la Yondani bado lipo akawaangalia viongozi wa ufundi wa Shirikisho la Soka la Tanzania (TFF) akalipiga mstari kwa nguvu jina la Yondani baada ya kuonyesha kukerwa na kitendo hicho akisema wazi kuwa ni utovu wa nidhamu.

Kocha huyo ameongeza wachezaji tisa katika kikosi hicho kinachojiandaa kwa mechi ya kirafiki dhidi ya Malawi itakayochezwa Mei 4 mwaka huu katika Uwanja wa Sokoine jijini Mbeya.

Wachezaji walioongezwa ni Edward Charles Manyama (JKT Ruvu), Elias Maguli (Ruvu Shooting), Hassan Dilunga (Yanga), Hussein Javu (Yanga), John Bocco (Azam), Kelvin Friday (Azam), Oscar Joshua (Yanga), Nadir Haroub (Yanga) na Shomari Kapombe (AC Cannes, Ufaransa).

Taifa Stars inayodhaminiwa na Kilimanjaro Pemium Lager, inaingia kambini leo Jumatatu jijini Mbeya kujiandaa kwa mechi dhidi ya Malawi.

Wakati huohuo, Tanzania imepangiwa kucheza na Zimbabwe katika raundi ya pili ya mechi za mchujo kuwania tiketi ya kucheza fainali za Kombe la Mataifa ya Afrika (AFCON) zitakazofanyika Morocco mwakani.

Stars itaanzia nyumbani ambapo mechi ya kwanza itachezwa kati ya Mei 16 na 18 wakati ile ya marudiano itachezwa Harare kati ya Mei 30 na Juni Mosi.

Katika hatua nyingine, Stars juzi Jumamosi ilitoa kali baada ya kupiga mashuti matatu tu katika mechi nzima dhidi ya Burundi.

Katika mchezo huo wa kirafiki uliochezwa Uwanja wa Taifa jijini Dar es Salaam, Stars ikiiwa chini ya kocha Salum Mayanga ilimaliza dakika 45 za kipindi cha kwanza ikipiga shuti moja pekee lililoshindwa kulenga lango. Kiungo mshambuliaji, Simon Msuva,  ndiye aliyelipiga.

Katika kipindi hicho Burundi ilipiga mashuti manne ambapo mawili yalilenga lango na mojawapo likazalisha bao lililofungwa na Didier Kavumbagu.

Kipindi cha pili licha ya Stars kufanya mabadiliko kadhaa hali ilizidi kuwa mbaya ambapo ilipiga mashuti mawili pekee yote yakishindwa kulenga lango, moja lilipigwa na Haroun Chanongo na jingine lilipigwa na Ramadhan Singano 'Messi' ambalo lilitoka nje. Burundi ilikipiga matatu mawili na mawili yakazaa mabao yaliyofungwa na mshambuliaji Amissi Tambwe na kiungo mkabaji Ndikumana Yusuf.

Akizungumzia hali hiyo, Mayanga alisema: "Tunataka kuwajaribu baadhi ya wachezaji wetu ambao huu ndiyo ulikuwa mchezo wao wa kwanza wa kimataifa, tumeona kila kitu sasa tunaenda kuyafanyia kazi mapungufu yaliyojitokeza."